REAL UNION: Otaño; Estrada, Gayoso (Letamendia, 81'), Rodellar, Azkoiti; Ekhi Senar, Llamas (Capalete, 84'), Mikel Alonso, El Haddadi (Urkizu, 72'); Domínguez, Eizmendi.

BURGOS: Saizar; Zabaleta, Ayoze, Rico, Andrés; Cruz, Beobide (Cusi, 84'), David Martín, Chevi (Carlos Álvarez, 76); Blázquez (Iker Hernández, 65'), Adrián Hernández.

GOLA: 1-0: Ekhi (19').

EPAILEA: Leandro Carbajales Gómez. Txartel horiak: Gayoso, Rodellar, Azkoiti (Real Union); Ayoze, Adrián Cruz (Burgos).

Krisialdi betean badago ere, talde indartsua da Burgos. Defentsan oso sendoa da, multzoan gol gutxien jaso duen taldea. Real Unionek, alabaina, gola sartu dio, igandeko partidako 19.minutuan. Ekhi Senarrek lortu du, korner baten ondorengo aldaratzean. Abantailak indarra eman dio talde txuribeltzari, eta ondo aritu da lehen zatian. Gayosoren eta Alonsoren jaurtiketetan, Mikel Saizarrek geldiketa onak egin behar izan ditu, 2-0ekoa ekiditeko. Burgosek ere eduki du abaguneren bat, baina atzelari txuribeltzak eta Otaño atezaina fin ibili dira haien lanean.

Bigarren zatian, euri etengabeak berdegunearen egoera okertu du pixkanaka. 70.minututik aurrera, euri jasa itzela izan da, eta ur asko pilatu da putzu handietan. Hori dela eta, azken minutuetan oso zaila izan da baloia nahi bezala mugitzea. Egoera horretan, abantailari eusteko ahalegin handia egin du Real Unionek. Aurkariak egoerara moldatzeko modua topatu du, eta gol aukerak eduki ditu. 70.minutuan geldiketa bikaina egin du Otañok, falta jaurtiketa batean. 90.ean, baloiak sarean amaitu du, baina jokoz kanpokoagatik baliorik gabe utzi du epaileak.

Azkenean, errenta mantendu du Unionek, hiru puntuak bildu eta lasai atseden hartzeko. Jaitsieraren arriskua urrun dago jada. Sailkapenaren goiko aldea ere bai, baina Riberaren taldearen itxura ona da. Pausoz-pauso gora egingo duela dirudi.