Galdu gabe hamaika partida egin ondoren, porrota jaso zuen Zaisa-Irunek larunbatean Elorrion. Hasieratik korapilatu zion norgehiagoka etxeko taldeak. Bi minutu besterik ez zituen behar izan lehen entsegua egiteko. Koplea gaindituta, jokoan nagusituz joan ziren beltzak hurrengo minutuetan, markagailuan 5-14koa jarri zuten arte. Hortik aurrera, etxeko taldeak intentsitate puntu bat gehiago erakutsi zuen. Irundarren defentsa gainditzeko hutsuneak topatu zituen, eta 27-14ko emaitza jarri zuen markagailuan atsedenaldirako.

Bigarren zatiaren hasieran, lehian sartzeko ahalegina egin zuen Irunek, Joel Herrerak lortutako entseguari eta Ugo Poncinik egindako transformazioari esker. Jokoa parekatu egin zen hurrengo minutuetan. Elorriok atzera egin behar izan zuen abantailari eusteko, baina beltzek ez zuten markagailuari buelta ematea lortu. Galduta ere, garaipen bakar bat behar du Zaisa-Irunek igoera faserako sailkatzeko. Larunbatean Donostian jokatuko dute irundarrek Bera Beraren aurka, 15:00etan Anoetako miniestadioan. Ligako azken aurreko neurketa izango da.