Running Fiz taldeko Sian May Robertsonek irabazi du Irun Hiria Krosa, emakumeen senior mailan (20:46). Atlético San Sebastiánen ari den Marina Gonzalez irundarra gelditu da bigarren, eta Beste Iruña taldeko Izaskun Beunza hirugarren. Gizonezkoetan, Goierri Garaia taldean ari den Kamel Zianik jantzi du txapela (26:26), Hiru Herriko Mostapha Charki izan da bigarren, eta Apalategi taldeko Gonzalo Fuentesek osatu du podiuma.

Igande goizean izan da Gipuzkoako kros denboraldia irekitzen duen proba, Super Amara Bidasoa Atletiko Taldeak antolatuta, Txingudi Ikastolako ohiko zirkuituan. Parte hartze errekorra hobetu du 49.edizioak, batez ere, federatuen artean parte hartzeak gora egin duelako. 840 parte hartzaile izan dira aurten, 205 federatu eta 635 haur (Iaz 173 federatu eta 630 haur izan ziren, 803 guztira).