LA RODA: Arellano; Pablo, Ramón, Samu, Oca; Guti, Sergio Camacho (Javi Bolo, 78'), Chupi (Abengózar, 88'), Adrien Goñi, óscar Martín (Espínola, 49') eta Megías.

REAL UNION: Txusta; Urkizu, Azkoiti, Aimar, Urbieta (Esnaola, 60'); Iriondo (Alonso, 80'), Mujika (Barrón, 74'), Rodellar, Galán, Juan Domínguez eta Eizmendi.

MARKAGAILUA: 0-1: Megías, bere atean (5'). 1-1: óscar Martín (24'). 2-1: Adrien Goñi (70')

EPAILEA: Gallego Gambín (Murtzia). Txartel horiak: Adrien Goñi eta Sergio Camacho (La Roda); Eizmendi eta Azkoiti (Real Union).

La Rodan galdu zuen igandean Real Unionek, markagailuan abantaila hartzea lortu zuen arren. Juan Domínguezen erdiratzea urrundu nahian, Megiasek bere atean sartu zuen baloia, bosgarren minutuan. Golak indartuta, gora egin zuen talde txuribeltzak. Joko eraginkorra erakutsi zuen, ikusgarria batzuetan. Irundarren bigarrena hurbil zegoela zirudienean, etxeko taldeak banakoa egin zuen, 23.minutuan. Oscar Martinek sartu zuen, falta jaurtiketa batekin. Banakoak norgehiagoka lasaitu eta orekatu zuen. Atsedenaldiaren aurretik, berriro estutu zuen Unionek. Juan Domínguezek Arellano atezainaren kontrako buruz burukoan huts egin zuen. Hurrengoan sarera bidali zuen Mujikaren gola, baina jokoz kanpokoagatik baliorik gabe utzi zuen epaileak.

Bigarren zatian haizeak eta euriak hartu zuten La Roda. Ekaitza iristearekin batera, hobera egin zuen etxeko taldeak. Ondo sartu zen bigarren zatian. Hala ere, Unionek baloiaren jabetza berreskuratu zuen pixkanaka. Gol aukerak sortzen ere hasi zen. Eizmendik eta Juan Domínguezek eskura izan zuten bigarrena, baina ez zuten azken errematean asmatu. Lehen zatian bezala, irundarren momenturik onena baliatu zuen La Rodak Txustaren atea zulatzeko. Adrien Goñik sartu zuen gola, Chupiren jaurtiketaren ondorengo aldaratzean. Puntu bat eskuratzeko ahaleginak egin zituen Unionek azken hogei minutuetan. Baina atearen inguruan ez zen fin ibili. Esku hutsik itzuli zen azkenean Aitor Zulaikaren taldea. Ebroren aurka bi aldiz ariko da aste honetan Real Union. Asteazkenean Zaragozan, Errege Kopako kanporaketan. Larunbatean, aldiz, Stadium Galen, ligako hirugarren jardunaldian.