Maila handiko lasterkariekin ospatu zuten 5K probaren 10. urteurrena

Goizeko 10:00etan eman zitzaion hasiera 5K distantziako bi txandari, aurreikusitako marken arabera banatuta: 20 minututik gorako txandan, mutilen kategorian, Imanol Bellido izan zen azkarrena (17:31), baina araudiak ezartzen duen marka muga dela eta (18:45etik gorakoentzat baitzen), podium ofiziala Mikel Hermosok, Lander Tapiak eta Unai Blancok osatu zuten. Emakumezkoetan, Naiara Domeño gailendu zen (19:29), eta bere atzetik Sara Aguirre (bigarren) eta Leire Eizaguirre (hirugarren) ailegatu ziren. 20 minutuz azpiko txandan, gizonezkoen lasterketa azken metroetaraino egon zen borrokatua; Kevin Lassere sartu zen lehen postuan kronoa 14:52an geldituz, lasterketan gertakari bat izan zuen Pierre Urrutyren eta Enaitz Aginagalderen (hirugarren) aitzinetik. Emakumezkoetan, Paula del Pozok autoritatez irabazi zuen proba (17:41), Maria Velazquezekin (bigarren) eta Idoia Nogalesekin (hirugarren) batera podiuma osatuz. Milan kirol egokitua eta txikiak Milako distantziak hainbat modalitate hunkigarri utzi zituen igandean zehar. Handbike txandan lau parte-hartzaileak igo ziren podiumera: Leire Troitiño izan zen azkarrena (4:57), eta handik gutxira Alberto Muñagorri, Kontxi Sagarzazu eta Joselu Rodriguez helmugaratu ziren. Adimen-desgaitasuna duten pertsonentzako mili erdiak ere parte-hartze nabarmena eta polita izan zuen, Kolon Pasealekuan zehar klubeko hainbat atletak lagunduta korrika eginez gozatu baitzuten. Mila herrikoia ere oso estua izan zen. Gizonezkoetan Jurdan Gonzalezek irabazi zuen (5:14), Victor Santillana (lau segundora) eta Gurutz Munduate (hirugarren) atzetik zituela. Nesketan, Maren Martin nagusitu zen (6:06), eta bigarren postuan Super Amara BATeko hiru korrikalariren arteko hiruko berdinketa historikoa egon zen: Amane Arruabarrena, Aiala Larruskain eta Ane Placeres. Azkenik, 6 eta 13 urte bitarteko txikienek “Mila txikian” parte hartu zuten, euren adinera egokitutako distantziekin. Osasuna, elkartasuna eta esker ona Jardunaldia goiz-goizetik hasi zen belaunaldien arteko indarrarekin, “Ttipi Ttapa” ibilaldi osasuntsuari esker. Ekimen honek 40 adineko pertsona bildu zituen miliako zirkuituan barrena oinezko ibilbide atsegina egiteko, eta helmugan, ohitura denez, tortilla pintxoekin eta urarekin harrera egin zitzaien euren parte-hartze aktiboa eskertzeko. Egunari bukaera emateko, Gipuzkoako Minbiziaren Aurkako Elkartearen aldeko martxa solidarioa egin zen, elkarteari ikusgaitasuna emateko; bildutako zenbateko osoa hurrengo egunetan iragarriko du antolakuntzak. Super Amara BAT klubak eskerrak eman nahi izan dizkie babesle nagusia den Salto Foundation fundazioari, Irungo Udalari, Gipuzkoako Foru Aldundiari, Super Amara komertzioari, Udaltzaingoari eta, batez ere, ezinbestekoa izan den boluntario talde guztiari, 10. urteurreneko edizio hau borobiltzea posible egiteagatik.