Billere-n kontra 27-33ko markagailua erdietsi zuen

Bidasoak aurredenboraldia bertze garaipen batekin itxi du. Pasa den ortziralean (irailak 1) Billere-n kontra jokatu zuen lagunartekoa, Pauen, eta 27-33ko markagailua erdietsi zuen talde irundarrak. Hasieratik hasi zen agintzen bisitaria, eta batez ere, azkeneko minutuetan emandako mailara esker, prestaketak ezin hobe bukatu ditu.

Lehen minututik nagusi izan zen Bidasoa, Billere-n kontrako neurketan. Jakub Skrzyniarz sendo ibili zen atean eta Iñaki Cavero eta Julen Mujika ere indartsu egon ziren erasoan. Horri esker, hiru goleko abantaila eskuratu zuen talde irundarrak hamargarren minutuan sartuta. Hala ere, berriz ere berdintasuna ailegatu zen markagailura eta atsedenaldia gol bakarreko aldearekin hasi zuten bi taldee, 13-14koarekin.

Bigarren zatian antzeko eskema izan zuen neurketak. Bidasoak lau goleko errenta irabazi zuen lehen minutuetan eta alde hori mantentzen jakin zuen ia ordu erdi guztian zehar. Horrez gain, azken hamabortz minutuetan, talde irundarrak lan ezin hobea egin zuen, bai erasoan baita defentsan ere, eta partidua 27-33ko markagailuarekin bukatu zen azkenean.

Aurredenboraldiko prestaketak bukatuta, taldea buru belarri ariko da aste honetan lanean. Izan ere, ASOBAL Ligako lehen hitzordu garrantzitsua izanen du larunbat honetan Artalekun. Barça jasoko du Jacobo Cuetararen taldeak etxean, denboraldiko lehen partidua jokatzeko (16:45).