La Nuciaren kontrako partidua festa bat izanen dela dio Igor Emeryk, Real Uniongo Administrazio Kontseiluko presidenteak. Ilusioz egiten diote aurre denboraldiko azken partiduari eta zaleen babesa jasotzea espero dute.

“Stadium Galetik Irun osora” zabaldu nahi dute giroa Real Unionetik. Hainbat jarduera antolatu dituzte denboraldiko azken partidua berotzeko eta “ongi borobildu nahi dute eguna”. Taldearen indarra azpimarratu nahi izan du Igor Emery klub txuribeltzeko presidenteak, azken momentura arte aukerekin ailegatzeko gai izan delako. “Guk nahi duguna eta jokalariek nahi dutena horrelako momentuak bizitzea da”, erran du. Lasaitasunez egin dute hori gainera, eta indarberrituta. Horrela, zaleak Galera hurbiltzea nahi dute, euren babesa taldeari erakusteko eta emaitza edozein dela ere, biharko jardunaldiaz gozatzeko.