LA ROCA: Oriol (3), Sánchez (8), Puig (5), Pérez (3), Lluque (2), Gascón, Montserrat, Capdevilla (2), González, Salado, Morales, Gesa, Martínez (1), Altes, Vaquer (4), Galán

BIDASOA: Zubiria, Dejanovic, Cavero (1), Mouriño (2), Vázquez, Martínez (4), Crowley, Beltza, Portero, Azkue (2), Villar (1), Odriozola (3), Bezbradica (8), Davidovic (1), Muiña (7).

MARKAGAILUA: 3-2, 4-2, 7-4, 9-6, 11-7, 14-11 (atsedenaldia); 16-17, 18-22, 20-23, 23-25, 27-27, 28-29.

Bi punturekin alde egin du Bidasoak Bartzelonako La Rocatik. Ozta-ozta izan du arrakasta ihesaldiak, gol bakarreko aldea irudikatu baitu markagailuak amaieran. Aurreko bi partida lasaiek eta bidaia luzeak eragin negatiboa izan dute Bidasoarengan. Ezustean harrapatu du etxeko taldearen gaitasunak. Elkarteen izenak alde batera gelditu dira, eta pistan, La Roca izan da nagusi. Bost goleko abantaila ere lortu du lehen zatian zehar (14-9). Bidasoaren erreakzioa iritsi da orduan, atsedenaldiaren aurretik neurketari eusteko (14-11).

Aldagelako berriketak edo errietak eragina izan du, kontzentrazio eta konfiantza handia erakutsi baititu Fernando Bolearen taldeak. 18-22koa jarri du Bidasoak hamar minutuko tartean. Etxeko taldeak lanean jarraitu du etsi gabe. Amaierarako bost minutu falta zirenean markagailua orekatu du La Rocak. Estu-estua izan da bukaera, baina bi puntu gehiago biltzea lortu du Irungo taldeak. Kauldi Odriozolak sartu du azken gola, eta Asier Zubiriak gelditu du La Rocaren azken jaurtiketa. Hirutik hiru neurketa irabazi ditu Bidasoak.