Euskal Ligako txapeldun izan ondotik, kadete mailako taldeak Euskal Kopa ere eskuratu du

Zaisa Bidasoa Irun kadete mailako taldea Euskal Kopako txapeldun bilakatu zen pasa den asteburuan, finalean San Adrian-i 39-35eko markagailuarekin garaitu ondotik. Hau ez da taldeak hilabete honetan lortu duen garaipen bakarra. Izan ere, aste bat lehenago Euskal Ligako txapeldun izan zen baita ere.

Modesto Urruñuelaren taldeak lehen multzoan hasi zuen Euskal Kopako txapelketa, Ereintza Aguaplast eta Tolosa CF Eskubaloia taldeekin batera. Hauen kontra, 43-22 eta 18-43 irabazi zuen Zaisa Bidasoak, hurrenez hurren, eta honekin finalerdietara iritsi zen taldea. Txapelketaren bigarren fase horretan, irundarrek 37-29 irabazi zioten Gran Camping Zarautzi.

Finalean, San Adrian izan zuen aurkari Urruñuelaren taldeak. Izan ere, nafarrek 39-35 irabazi zieten Urdaneta A taldekoei bertze finalerdian. Irundarrek finala ere eskuratu zuten, San Adrian taldea 39-35eko emaitzarekin mendean hartuta. Horrela, Zaisa Bidasoak denboraldi bikaina borobildu du Euskal Liga ere eskuratuta.

Bi garaipen hauek lortuta, Modesto Urruñuelaren taldeak Espainiako Txapelketaren sektore fasea jokatuko du heldu den maiatzaren 11tik 14ra. Oraindik ere erabakitzeko dago zein izanen den txapelketa honen egoitza. Jubenil mailako BM Bidasoa Irungo jokalariek ere kanporaketa bera jokatuko dute asteburu horretan. Hauek G multzoan izanen dira, Fertiberia Puerto Sagunto, CAB Cartagena eta BM Ikasa taldeekin batera.